اللي راح منه رمضان ... ابشر...لسه الباب ماتقفلش

السلام عليكم ورحمة الله وبركاته

اصدقائي واحبائي ..........

كل سنة وانتم طيبين

مش هارغي ومش هاطول عليكم وهادخل في الموضوع علي طول

بس برده مش هاقدر ماقولش.........وحشتووووووووووووووني اوي اوي بطريقة بشعة وفظيعة ومريعة

ووحشتني مدونتي جدا

.اموووووووووهند

انتم عارفين بكرة ده اول ايام ايه؟

عارفين العشر الايام الاوائل من ذي الحجة؟

بصراحة انا مكنتش متخيلة ان الايام دي عظيمة اوي كده

وان فضلها عند ربنا كبير اوي كده

تخيلوا ان حبيبي رسول الله بيقول ان الايام دي عند ربنا افضل من الجهاد في سبيل الله؟؟؟؟؟

متخيلين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الايام دي افضل ايام السنة الي الله

يعني اللي ضاع منه رمضان مايزعلش

ربنا اهو بيديله فرصة تانية

فرصة ان ربنا يمحي كل ذنوبه

فرصة ان ربنا يستجيب لدعاءه

ياااااااااااااااااااااااااااااه

ها؟؟؟ ناوين علي ايه؟؟؟

مش هنضيعهم .... صح؟؟؟

ان شاء الله مش هانضيعهم

بصوا بقي فضل كل يوم ايه وشوفوا انتم عايزين ايه

وواطلبوا واتمنووووووووووووووووو دي فرصة

ياما انت كريم يارب

**************

فضل اليوم الاول::

اليوم الاول الذى غفر الله فية لأدم عليه السلام

من صام ذلك اليوم غفر الله له ذنبه

فضل اليوم الثاني::

استجاب الله دعاء يونس عليه السلام فأخرجه من بطن الحوت

من صام ذلك اليوم كان كمن عبد الله سنه ولم يعصى الله فى عبادته طرفة عين

فضل اليوم الثالث::

الذى استحاب الله فيه دعاء زكريا عليه السلام

من صام ذلك اليوم استجابه الله دعاءه

فضل اليوم الرابع::

الذى ولد فية عيس عليه السلام

من صام ذلك اليوم نفى الله عنه البأس والفقر وكان يوم القيامة مع السفرة البررة الكرام

فضل اليوم الخامس:

الذى ولد فيه موسى عليه السلام

من صام ذلك اليوم برئ من النفاق وعذاب القبر

فضل اليوم السادس::

اليوم الذى فتح الله تعالى لنبيه فية الخير

من صام ذلك اليوم ينظر الله إليه بالرحمة

فضل اليوم السابع::

الذى يغلق فيه ابواب جهنم ولا تفتح حتى تمضى ايام العشر

من صامه أغلق الله عنه ثلاثين باب من ابواب جهنم

فضل اليوم الثامن::

الذى يسمى يوم الترويه

من صامه أعطى من الاجر ما لا يعلمه الا الله تعالى

فضل اليوم التاسع::

اليوم الذى هو يوم عرفة

من صامه كان كفارة لسنه ماضية ومستقبلية وهو الذى انزل فيه

(اليوم اكملت لكم دينكم واتممت عليكم نعمتى ورضيت لكم الاسلام دينا)

فضل اليوم العاشر::

وهو يوم الاضحى

من قرب قربانا فيه فباول قطرة من دمه غفر الله له من ذنبه وذنوب عياله

ومن اطعم فيه مؤمنا او تصدق فيه بصدقه

بعثه الله تعالى يوم القيامه امننا ويكون ميزانه اثقل من جبل أُحد

الله الله الله

بصراحة انا عايزة كل ده

ربنا يقدرني ويقدركم ونصوووووووووووووووووم ان شاء الله

ومش بس نصوم ...اللي بيذاكر مننا يشد حيله اوي اوي في الايام دي

واللي بيشتغل يتقي ربنا اوي في شغله ويبذل اقصي ما عنده

ونكثر الدعاء لينا ولامة المسلمين وبالاخص المحاصرين في غزة

تخيلوا لما في الايام العظيمة دي كلنا ندعيلهم ان ربنا يفرج كربهم وينتقم من اعداء الله

طلب اخير انا عشمانة فيكم

انكم كلكم تدعوا لطلبة كلية الطب دفعة سنة 6 لانهم بيمتحنوا الايام دي

ربنا يقويهم يارب ويجعل الصعب عليهم سهل ويرزقهم بنتائج حلوة ترضيهم

وهاغلس عليكم طبعا كعادتي واطمع في كرمكم انك تدعولي ربنا يدخلي الجنة ويهديني ويفرح قلبي

ويشفي كل مريض

واخيرا وليس بأخر

ده لينك مباشر لفيديو

بيتكلم فيه الشيخ حازم شومان عن فضل ال 10 أيام الاوائل من ذي الحجة

http://www.way2allah.com/modules.php?name=Khotab&op=Detailes&khid=8963

والله احبكم في الله

لا اله الا الله ........ سيدنا محمد رسول الله

I want no more PAIN please

انا لما جيت مالغيب

العدل كان كيفي

والحق كان مطمعي

والحب كان سيفي

دقيت علي الابواب

لاقتني فالسرداب

غابة من الانياب....... مسنونة حواليا

مع الاسف يابا

الدنيا دي غابة

مالناش مكان فيها

يا عيني يا وعدي عالمغرمين بعدي.......... والطيبين فيها

لاول مرة في حياتي مش عارفة اعبر عن اللي حاسة بيه

اكتفيت بكلمات الاغنية دي يمكن تعبر عن شيء من اللي جوايا

--------------------

ساعات الواحد بيجي عليه وقت

ويحس انه عايز يبعد عن كل حاجة

ويحس انه لازم يعيد تفكير ويعيد حساباته

عشان كده قررت اني اقفل المدونة وابعد

وربنا يعدي الفترة دي علي خير واقدر ارجع لكم تاني

ويا عالم هارجع للتدوين تاني والا لا!

مش عايزاكم تبقوا زعلانين مني

يمكن اما ابعد فترة ارتاح

بس ليا طلبين عندكم:

الاول انكم تاخدوا بالكم من نفسكم جدا

والتاني انكم تدعولي لاني فعلا والله محتاجة الدعاء

------------------------

استودعكم الله الذي لا تضيع عنده الودائع

لا اله الا الله ...........سيدنا محمد رسول الله

لو لم أكن طبيبة لوددت أن اكون طبيبة

السلام عليكم ورحمة الله وبركاته,,,,,,,

بصوا يا جماعة انا جاية اتكلم انهاردة عن موضوع بجد خنقني

وسمعت فيه كلام كتير من اطباء ومن غير اطباء

وكلام كتير لاذع علينا

واللي دفعني اني اقول الكلام ده هو المشكلة اللي حصلت بين حنين(وهي انسانة عادية مرت بتجربة صعبة مع رحلة علاج وكان نصيبها انها وقعت مع دكاترة مش بيراعوا ربنا)

ودكتور عمرو(وهو طبيب بيدافع عن الاطباء وبيقول ان مش كل الدكاترة كده)واسمحولي كمان اني اعلق علي كلام دكتور صقر(استاذ طب يدرس بالخارج)

وقبل ما اتكلم

انا قبل ما اكون طالبة طب انا انسانة زيي زيكم

وباتعب وباروح لدكاترة ووقعت برده في دكاترة مش كويسين كتير

انا حاولت ارد عند حنين في المدونة بتاعتها

بس حسيت ان الكلام هيبقي كتير

وان بجد الموضوع يستاهل اني اخصص له بوست كامل

الي حنين...............

اولا انا قلبي معاكي لاني بجد عارفة يعني ايه الواحد يبقي

وبيتألم ويدوخ علي الدكاترة ويدفع فلوس كتير

وبعد رحلة علاج طويلة بيتبهدل فيها ادوية

يكتشف ان تشخصيه غلط وفيييييييييييين بقي في الاخر

لما يقع في دكتور شاطر وفاهم الطب صح يشخصه صح وربنا يتم شفاه علي خير ........

.بس يا حنين زي ما في دكاترة كده

في برده دكاترة بيراعوا ربنا وبيحاولوا انهم يتعلموا طب بجد علي اصوله

في ظل ظروف بلدنا اللي ما يعلم بيها الا ربنا.....

بيعز علينا اوي يا حنين ان في عز ما احنا بنحاول وبنجتهد وبنسهر الليالي

عشان نتعلم ونقدر نفيدكم اننا نشوف كلام زي كلامك ده........

انا عارفة انك ماتقصديش اي اهانة لاي دكتور

وعارفة ان اللي وصفتيه ده هو امر فعلا واقع بس انتي برده كان في بعض كلامك لاذع زي مثلا:

(عندما كنت صغيره, كنت دائما ما أتمنى ان أكون طبيبه , لكى يكون اسمى معلقا على كل جدران الحى... وعلى كل الحوائط فى المدينه , رغبة فى أن أرى اسمى معلقا مثل كل الاسماء الأخرى , والتى قد تصبيك احيانا بالتلوث البصرى.لم تكن امنيتى أن أكون طبيبه........... لكنى أحببت أن أكون طبيبه لكى أرى اسمى معلقا هكذا..
وتبقى أحلام الطفوله.... أحلام, وما الامانى والاحلام الا تضليل على قول الشاعر كعب ابن زهير.
لكن نظراتى الطفوليه البريئه قد تغيرت عندما كبرت , وعرفت أن معظمها مثل ,
أسماء الاعلانات والمنتجات تماما,)

الكلام ده مايصحش يا حنين ........

دي مهنة عظيمة مايصحش يتقال انها زي الاعلانات والمنتجات

مهما مريتي بمواقف صعبة مع دكاترة حسبي الله ونعم الوكيل فيهم

يبقي تعممي وتقولي الكلام ده علي الدكاترة او علي المهنة العظيمة دي

مش عظيمة عشان هي مهنتي........

عظيمة عشان بنتحمل فيها اللي كفيل انه يدمر اعصابنا

احنا بشر زينا زيكم يا حنين

بنشوف عيانين كتير يموتوا قدامنا واحنا مش قادرين نعمل لهم حاجة

يا اما لنقص امكانيات او لعدم اكتشاف علاجه

بس في كل الحالات هو ألم نفسي بشع وفظيع

وبيبقي ألم افظع لما نسمع عن دكاترة مهملين ومقصرين زي اللي حكيتي عنهم دووول

انا مش باقول الكلام ده عشان نسمع كلمة شكر او تقدير من حد لالالالالا

ثوابنا عظيم عند ربنا ان شاء االله

بس اعتقد ان ابسط حقوقنا اننا منسمعش كلام زي دي ولا اهانات زي دي

الف سلامة عليكي ........ وربنا يتم شفاكي علي خير

الي دكتور عمرو فاروق....................

سلام عليكم دكتور ....

انا مش عايزة حضرتك تضايق من كلام حنين

احنا برده لازم نعذرها لان هي بجد اتعذبت واتألمت

واي كلمة اتقالت من حنين او من اي حد علق في مدونتها

او في مدونة حضرتك

فهي رأي شخصي لا ينقص من الاطباء شيء

ولا ينقص من عظمة المهنة دي شيء

تعبنا يا دكتور والعذاب والالم اللي بنشوفه ثوابنا عند ربنا مش من البشر

امبارح كنت في محاضرة اطفال والدكتورة سألتنا سؤال انتو ليه دخلتوا كلية الطب؟

وكل واحد فينا كانت ليه اجابته........

عارف يا دكتور هي كانت اجابتها ايه؟

ان هي بتدرس كل السنين دي ومستنية فرصة تجيبلها

انها تنقذ حياة بني ادم واحد بس عشان يبقي سبب في دخولها الجنة

(ومن احياها فقد احيا الناس جميعا)

وقالت لو ده حصل وكنت سبب في انقاذ مريض واحد

يبقي انت خلاص مش عايز حاجة تاني مالدنيا موت وانت مطمن

ابشر بالجنة يا دكتور ........

.وخلينا برده نجتهد برغم كل الكلام اللي بنسمعه

وبرغم الدكاترة اللي مشوهين مهنة الطب في نظر الناس

ربنا يوفق حضرتك يا دكتور ونسمع عن حضرتك سمع خير

الي دكتور صقر......

انا بني ادمة عادية جدا فتحت عنيا عالدنيا

لاقيت اني كل ما اتألم واتعب والدتي توديني عند واحد كده

بيلبس بالطو ابيض وبيضحك في وشيي

وبيديني علاج وباخده والالم بيروح ....

برغم انه ساعات بيدني حقن وبيتوجعنيييييييييييييي .... بس في الاخر باخف

حسيت ان هو ده اللي نفسي فيه....

هو ده اللي نفسي اعيش الباقي من عمري عشانه ....

انا عايزة ابقي زي الدكتور ده

كبرت وكبر حلمي جوايا وربنا كرمني ودخلت كلية الطب

واتصدمت بالواقع الاليم ......

ولاقيت نظام الدراسة متخلف وغبي(سوري عاللفظ بس هو مايتقالش غير كده)

نظام يخليك تندم انك في يوم مالايام فكرت انك تبقي طبيب ....

.ناس كتير اتكسرت وسابت الدراسة وحولت كلية تانية

وناس كتير قالوا يلا ادينا هانقضيها وزي ما تيجي تيجي

وناس قالوا لا احنا مش هانستسلم وهنحاول في ظل الظروف اللي بنمر بيها دي

اننا برده نتعلم ونبقي دكاترة بتفهم

نحاول اننا نحفظ زي ما هما عايزين عشان نجيب التقدير

اللي يوصلنا اننا ندرس في الخارج او ان تجيلنا اي فرصة نتعلم الطب علي ايد

اطباء زي حضرتك كده يا دكتور ....

اطباء درسوا الطب كما يجب ان يكون

وفي نفس الوقت بنحاول نتعلم الطب

واحنا هنا في اننا نبحث مستخدمين الانترنت

ونشوف الناس اللي برا دوول بيفكروا ازاي

يعني انا كنت فكرت اني اعمل فالمدونة دي اني اجيب حالات واناقشها علي

حد معلوماتي الضئيلة في اني بس احاول اتعلم انا وصحابي الطلبة ازاي نفكر وازاي نشخص صح

وبعد كده قررت اني اعمل مدونة كاملة عن كده وكتبت الكلام ده في بوست قبل كده

وان لو في امكانية نستعين باطباء ان طريق الانترنت زي حضرتك يادكتور وزي دكتور عمرو

في انهم يساعدونا ويصححوا لينا لما نغلط

سنة 5 صعبة جدا وطويلة ومافيهاش وقت للانترنت انا عارفة

وخاصة لاننا بناخد باطنة واطفال

بس انا لما حسيت بالواقع المرير اللي اتكلمت عنه يا دكتور

حسيت اني لازم احاول اغير الوضع ده

مش اني اقول كلام لاذع وازعل وبس

مش يمكن في يوم من الايام حد مننا يمسك منصب يمكنه انه يغير من حال الطب في البلد؟!!!!!

مين عارف ؟

بس علي الاقل احنا بنحاول نغير اوضاع كتير غلط

ونشوف دكاترة كتير زي اللي حضرتك اتكلمت عنهم

بس ده مايديناش الحق برده اننا نتكلم بالطريقة دي وحضرتك بتقول:

(من حق كل مريض أن يلقى الرعاية المناسبة و ليس من حق أحد أن يبقى الدجالون باسم الطب يعيثون فساداً فى الأرض . لسنا ملائكة كى نعفى من المسئولية.او ان نضع حاجزاً قوياً يمنع الناس منا. يصل الى التجريح و السخرية و الاساءة الى كل من يحاول لفت الانتباه الى الأمثلة السيئة بل والمشينة فى عالم الأطباء الذى يموج بكل الأمثلة على طرفى النقيض)

ايوة احنا فعلا مش ملائكة احنا بشر

وفينا الصح وفينا الغلط

فينا اللي بيراعي ربنا وفينا اللي مش بيراعي ربنا

ودكتور عمرو مايقصدش اي اهانة ولا اي سخرية من حنين .....

بس هو عز عليه ان في ظل الظروف اللي احنا بندرس فيها الطب في مصر

يجي ويسمع كلام حنين وهي بتعمم القضية كده ........

وانا بصراحة مش شايفة في كلام دكتور عمرو اهانة لحنين

وان كان فيه بعض الحدة ودي نابعة من الظروف اللي احنا بنجاهد فيها

في بلد اكتر مهنة مُهانة فيها هي الطب

قبل ما نلوم الاطباء نشوف الاول هما واخدين حقوقهم والا لا؟

احنا بنطلب من الدكتور انه يتعلم ويبحث عن المعلومة

ده هيجي منين وهو بياخد مرتب مايزدش عن 400 جنيه

ما هو اصل مش كلنا اتولدنا لاقينا اهالينا دكاترة يساعدونا

ولا لاقينا الفلوس اللي تسندنا عشان نتغلب علي ظروف البلد

_______________________________

اسفة اني رغيت وطولت عليكم

ومش عايزة اي حد فيكم يزعل من كلامي انا مقصدتش اني ازعل حد

بس من ابسط حقوقي

اني اقول كلام بيدور جوايا عن المهنة اللي هاقضي فيها عمري

واللي ناس كتير اوي مش حاسين معناها

وبعدين كده عطلتوني عن المذاكرة؟؟؟

عندي امتحان اطفاااااااااااااااال يا جدعاااااااااان

يلا بقي هارخم عليكم كالعادة وهاطمع في انكم تدعولي في كل سجدة

وياريت يا حنين ويا دكتور عمرو محدش يزعل من التاني بقي

كلنا في الاول وفي الاخر بني ادمين

واي حاجة وحشة او كويسة فالبلد في علينا كلنا

وانا باطلب منكم انكم تنهوا الموضوع ده في مدوناتكم

تقبلوا تحياتي......................من واحدة نفسها تتعلم الطب كما يجب ان يكون

R.N.F.

بالله يقيني

يارب يارب..

لقد ضعفت ولا غيرك يقويني

لقد يئست ولم أفقد فيك يقيني

لقد ضللت ولا سواك هاديني

لقد غرقت وأنت فقط منجيني

يارب..

ارحمني في لحظة ضعفي

وابعد عني شياطيني ونفسي

واهدِ لي قلبي وعقلي واغفر لي خطيئتي ويأسي

يارب.

إلى من أشكو وأنت موجود

ولمن أبكي وبابك غير مردود

ومن أدعو وأنت فقط المعبود

ومن أرجو ورجائي فيك غير محدود

يارب

اجعل عفوك عني دائم

ورضاك علي قائم

واجعلني عن الذنوب نادم

ولباب توبتك قادم

________________________

أسألكم الدعاء

وقفة مع النفس

الي كل من ينظر الي مرآته ويبكي

الي كل من يحمل الكرة الارضية علي رأسه

الي كل من يظن انه اكثر انسان مصاب في العالم

الي كل من ينظر الي انسان ويقول يا ليتني كنت في مثل ثرائه او صحته

الي كل من يندب حظه...........انظر حولك وتفكر في خلق الله وحكمته في بديع صنعه
هو العزيز المقتدر خلق كل شيء بقدر ولحكمة لا يعلمها الا هو
_______________

Do you think you are unhappy??........ look at them

If you think your salary is low, how about her؟

If you think you don't have many friends...

When you feel like giving up, think of this man

If you think you suffer in life, do you suffer as much as he does?

If you complain about your transport system, how about them?

If your society is unfair to you, how about her?

لقد اعجزتني تلك الصور عن الكلام فعندما اشعر بأي ألم او تذمر من اي شئ يحدث لي

وهو في نظري -انا المخلوق الضعيف- شيء سئ لا اريده

بل دائما ابحث عن الافضل والافضل والافضل انظر الي تلك الصور

واغرق في تفكير عميق ......سائلة نفسي لماذا انا حزينة هكذا؟؟ لماذا احمل الدنيا علي رأسي؟؟

لماذا ابكي وهناك حبيبي خالقي .....يسمعني في كل وقت....ويفتح لي باب الرحمة والمغفرة؟

لماذا احزن علي شئ فاتني.......هل سأكون علي علم بما هو خير لي اكتر ممن خلقني وقدر رزقي؟؟؟

لماذا لماذا لماذا لماذا.............مليون لماذا تدور في رأسي!!!

ناسية بأن هناك الخالق العظيم هو الذي خلقني من تراب

وهو الذي يدبر لي امري وهو من يعلم الخير لي حتي ان كان في نظري اسوأ شيء قد يحدث لي في تلك الدنيا

......................................

يقول الشيخ عائض القرني:

اذكر نعم الله عليك فاذا هي تغمرك من فوقك ومن تحت قدميك

(وان تعدوا نعمة الله لا تحصوها)

صحة في بدن........أمن في وطن,

غذاء وكساء. ......... لديك الدنيا وأنت ما تشعر ,

تملك الحياة وأنت لا تعلم

(واسبغ عليكم نعمه ظاهرة وباطنة)

عندك عينان,ولسان وشفتان ويدان ورجلان

(فبأي آلاء ربكما تكذبان)

هل هي مسألة سهلة ان تمشي علي قدميك وقد بترت اقدام؟

وأن تعتمد علي ساقيك وقد قطعت سوق؟

احقيق ان تنام ملء عينيك وقد اطار الالم نوم الكثير؟

وان تملأ معدتك من الطعام الشهي وأن تكرع من الماء البارد وهناك من عُكر عليه الطعام ونغص عليه الشراب بأمراض وأسقام؟

أتريد في بصرك وحده كجبل أحد ذهبا؟

أتحب بيع سمعك وزن ثهلان فضة؟هل تشتري قصور الزهراء بلسانك فتكون ابكم؟

انك تعيش في نعم عميمة وأفضال جسيمة ولكنك لا تدري

تعيش مهموما مغموما حزينا كئيبا وعندك الخبز الدافيء والماء البارد والنوم الهانيء والعافية الوارفة

تتفكر في المفقود ولا تشكر الموجود,

تنزعج من خسارة مالية وعندك مفتاح السعادة وقناطير مقنطرة من الخير والمواهب والنعم والاشياء!!!!!!!

فكر واشكر........

(وفي أنفسكم أفلا تبصرون) .

فكر في نفسك وأهلك وبيتك وعملك وعافيتك وأصدقائك والدنيا من حولك.......

(يعرفون نعمة الله ثم ينكروها).

________________________

أحبكم في الله

R.N.F.

حبة طب عالماشي

السلام عليكم....................

قررنا نحن ريهام ابوالمجد وانا في كامل قواي العقلية

تغيير نشاط المدونة فالفترة القادمة

انا عارفة ان ناس كتير هتضايق مني

بس انا حاسة اني عايزة اعمل حاجة للطب

بس ده مايمنعش اني هاجي واغلس عليكم برده

كالعادة واحكي عن اللي باحسه في الدنيا العجيبة دي

بصوا بقي ...

.التركيز ان شاء الله هيبقي علي الاطقال والباطنة بصفة خاصة

وعلي بقية فروع الطب بصفة عامة

بس معظم الحاجات هتبقي

case studying

يعني مثلا هاجيب صور لحالات معينة ومفروض اننا نعرف الحالة دي ايه؟؟؟؟

او هتبقي

problem solving

يعني هاحكي عن شوية

symptoms and signs

ومفروض نفكر سوا في الحل بتاعها

واي تسجيلات اقدر اجيبها هاجيبها وخاصة

videos of medical examination

بس دعواتكم معانا بقي

............................................

وكبداية

this link contains different types of heart sounds

you can hear it online while u r doing anything on the internet

to make these sounds familiar to your ears and to be able to

differentiate each pathological heart sound

http://www.med.ucla.edu/wilkes/inex.htm

________________________

يارب علمني بان الفشل هو الخطوات التي تسبق النجاح

يارب علمني ان التسامح هو اعلي مراتب القوم وان حب الانتقام هو اول مظاهر الضعف

لا اله الا انت سبحانك اني كنت من الظالمين

__________________________

بتلف الدنيا بينا وساعات بتجرحنا

ايام بتفوت علينا وتاخدنا من روحنا

ساعات بنتألم وساعات بنستسلم

بس الاكيد مع كل جرح لازم بنتعلم

احنا اتخلقنا فالحياة عشان نعيشها

مهما تكون فينا الجراح لازم نحوشها

الليل ساعات بيكون غميق

بس النجوم مالية الطريق

مش كل سكة هنمشي فيها الشوك هيفرشها

R.N.F

عيد سعيد يا كتاكيت

السلام عليكم ورحمة الله وبركاته,

بصوا بقي انا المرادي لو قعدت اقول من هنا للسنة الجاية

اد ايه انتم وحشتوني

واد ايه الكتابة في المدونة وحشاني

مش هاقدر اعبر عن جزء بسيط من اللي جوايا

انا بابص لتاريخ اخر بوست

ومش متخيلة اني بقالي بتاع شهرين مثلا مافتحتش المدونة!!!!!!!!

بس هي الظروف كلها كانت ضدي والله

النت كان بقاله كتير اوي فاصل

بس بصراحة بقي مش بس عشان النت فاصل

انا كنت بامر بشوية ظروف كده يعني بلاش اخوض فيها

لسببين الاولاني اني عايزة انساها

والتاني لان العيد بكرة

والعيد فرحة يا سلاااااااااااااااااااااااااااااااااااااام

علي فكرة بقي انا لسه ماعلقتش البلالين

وماخدتش العيدية من بابا

بس هو يعني هيروح مني فين؟!!!!!!!!!! وراه وراه لحد ما اخدها

صحييييييييييييييييييييييييييييييح نسيت اقولكم

تخيلوا اني بادئة الدراسة من 1/9

يعني انا بصراحة مش عارفة اشكر وكيل الكلية ازاي

ادعولووووووووووووو ادعولووووووووووووووو.................

والله يا جماعة انا اتسلقت ططول شهر رمضان في الشمس

يوميا بارجع الساعة 4 العصر في عز الشمس

لما بقيت شبه البيضة المسلوقة ...لا.... بيضة ايه .... قولوا فحمة مثلا

المهم بقي هارحمكم المرادي من الرغي بتاعي

انا بس حبيت اسلم عليكم واعيد عليكم

كل سنة وانتم بالف خير وصحة وسعادة

والسنة الجاية زي دلوقتي تكونوا حققتم كل احلامكم يارب

فين العيدية بقي يا حلوين؟؟؟؟؟؟؟؟؟؟؟؟

انا محضرة مواضيع حلوة للمدونة في الايام الجاية ان شاء الله

بس يارب تعجبكم

وهاخنق عليكم بقي براحتي............انا سامعة حد بيعترض!!!!!!!!!!!!!!

انا كويسة الحمدلله ماتقلقوش عليا انا عايزة استفيض واحكيلكم عن سنة خامسة

بس خليها المرة الجاية بقي

لا اله الا الله ......... سيدنا محمد رسول الله

الكوخ المحترق

كان يا ما كان يا سادة يا كرام....

(طول عمري وانا صغيرة اسعها يا سعد يا اكرام وكنت هفطس واعرف مين سعد ومين اكرام دوول اللي بيدخلوا في كل حدوتة)

كان في سفينة ماشية في عرض البحر

وعليها ناس كتير اوي

اشكال والوان من كل مكان

فيهم اللي سايب بلده ورايح يدور علي رزقه في بلد تانية

وفيهم اللي رايح يقضي اجازته في مكان تاني ويتفسح

وغيرهم ناس تانية .................

كانت السفينة ماشية في البحر في امان الله

وحالة الجو كويسة جدا ومفيش اي مؤشر لحدوث حاجة كده والا كده

وفجأة...................

وبدون سابق انذار تهب عاصفة جامدة جدا جدا وتطيح بكل حاجة علي السفينة

والركاب بقي كلهم غرقوا ماعدا شخص واحد

فضلت بقي موجة تاخده وموجه تجيبه .... بس هوا كان مؤمن بربنا جدا وبيقول يارب ومتمسك بالحياة

لحد ما وصل لجزيرة .... مالاقاش فيها اي انسان ... اتصدم وقال:

ايه اللي فاضل عشان اعيش عشانه

انا ماعرفش ايه المكان ده؟

ولا في يوم من الايام حد هيوصللي ولا هرجع بلدي ابدا!!!!!!!!!!

بس هاعمل ايه؟ انا مؤمن بالله ولازم ارضي بقضاء الله

اصل ربنا عمره ما بيعمل حاجة وحشة

وراح بقي يتجول في الجزيرة يدور علي حاجة ياكلها

واعتمد علي ورق الاشجار وشوية الثمار اللي كانت موجودة في الجزيرة

وقطع شوية اشجار وعمل بيهم كوخ صغير يعيش فيه الحبة الفاضلين من عمره ويعبد ربنا ويذكره

وفي يوم كان عامل نار وحاطط عليها شوية ثمار عشان يستوو وياكل بقي وكده

وراح يلف شوية في الجزيرة علي ما الاكل يستوي

لما رجع بص لقي الكوخ بيتحرق ااااااااااااااااااااااااااااااااااااااااااه

وقال:

يعني مش كفاية اني في مكان غريب ولوحدي

وكمان المكان الوحيد اللي عايش فيه يتحرق

ليه يارب كده ؟ لييييييييييييه يحصلي كده؟

انا طول عمري مؤمن بيك ومعملتش حاجة وحشة في حد عشان يحصلي كده

ورايح نايم وهو حزين جدا

صحي الصبح لقي سفينة بترسو علي شاطيء الجزيرة

الراجل مكانش مصدق وقال لنفسه:

انا اكيد بيتهيالي مش معقولة تكون دي سفينة انا اكيد باحلم

دعك في عنيه شوية كده وبص تاني لقي برده سفينة قال لا بقي مابدهاش وراح يجري عليها

وطلعت فعلا سفينة ...هييييييييييييييييه ياما انت كريم يا رب

سال صحاب السفينة انتو عرفتوا مكاني ازاي؟؟

قالوا له احنا شوفنا دخان طالع من الجزيرة وعرفنا ان في حد بيطلب النجاة

!!!!!!!!!!!!!!!!!!!!!!!!!!!!!!!!!!!

سجد الراجل علي الارض وهو في مكانه وقعد يستغفر ربنا سامحني يارب

سامحني اني اعترضت علي قضائك

_____________________

مبدأيا كده القصة دي انا لاقتها عندي عالجهاز معمولة باور بوينت

وهي طبعا كانت مختصرة جدا عن كده وانا معرفش هي حقيقة والا لا

بس عجبتني جدا جدا وفيها معني جميل جدا يارب يكون وصل لكم

انا حاولت اصيغها باسلوبي بس سامحوني انا جديدة في موضوع الكتابة وحاولت اعبر علي اد ما اقدر

المهم بقي يا كتاكيت............

الراجل ده ربنا حططه في اختبارين....

هوا مؤمن بالله بالدرجة اللي خليته يعدي من الاختبار الاول

وهوا انه رضي بقضاء ربنا وحاول يتعايش مع الموقف

بس جه بقي في الاختبار التاني ومارضيش بققضاء الله واعترض ان هو ازاي يكون بيعبد ربنا كده

ويجراله اللي جراله ده؟

طب انا باسأل نفسي سؤال وعايزة اسأله ليكم برده؟؟

هوا احنا ليه لما بتحصل لنا مشكلة او اذمة في حياتنا بنقول هوا احنا عملنا ايه وحش في حياتنا عشان ربنا يعمل فينا كده

انا عملت ايه في دنيتي يارب عشان فولان يبيعني ويسبني

انا يارب عمري ما اذيت حد يبقي فولان ليه يأذيني

ليه ما بنقولش لنفسنا ان عشان انا مؤمن بالله ربنا بيبتيليني بالمصيبة او الاذمة دي وانا لازم اصبر وارضي واحتسب اجري عند ربنا

وان علي قدر الايمان بيكون الابتلاء

ما هو اصل يعني مش عشان احنا بنعبد ربنا وبنطيعه ومابنأذيش حد

لازم الدنيا تبقي ماشية حلوة وسهلة من غير اذمات

لا مينفعش

ماتبقاش الدنيا دنيااااااااااااا

امال ازاي بقي يبان ايمانك وانك فعلا بتحب ربنا وواثق انه مش هيختار ليك غير الخير

_______________

اللي خلاني اجي واكتب لكم الكلام ده موقف حصل معايا..... كالاتي:

الحمدلله ربنا يسر لي الحال واشتركت في كورس دراسي

وحضرت اول يوم في الكورس ده وكانت حفلة جميلة جدا

وحمد ربنا انه كرمني بالكورس ده وانه الحمدلله بيعوضني

تاني يوم بقي كانت اول محاضرة نظري في الكورس ده

المفروض اني باظبط المنبه عشان اصحي 7 صباحا بس علي مين؟

انا اصحي علي صوت منبه؟ مابقاش ريهام

ده ان ماكانتش ماما تصرخ في ودني وتزعق وتصحي الجيران وبرده انا ماصحاش غير بعدد عذاب

مابقاش ريهااااااااااااااااااااام

المهم ان انا نسيت اقول لماما تصحيني ومش عارفة انا نسيت ازاي

صحيت ماما وراحت الشغل وانا يا عيني في سابع نومة سابع مين قولوا عاشر عشرين حاجاة كده يعني

صحيت بابص في الساعة لاقتها 10.30 والمحاضرة اساسا الساعة 9

!!!!!!!!!!!!!!!!!!!!!!

اتضايقت بطريقة لا تتخيلوها وحسيت بالغباء وقلت يعني لما ربنا يبعتلي حاجة زي دي باهمالي وكسلي اضيعها

قلت الحمدلله لعل في ذلك خير ... صاحبتي اكيد هتروح وهتبقي تشرحلي خدوا ايه

مافيش دقايق جاتلي رسالة عالموبايل بابص فيها لاقيت صاحبتي بتقولي انها تعبانة وانا ماعرفتش تروح

هههههههههههههههههههههه فطست علي روحي مالضحك من الموقف

يعني المحاضرة خلاص راحت راحت مفيش كلام

قلت الحمدلله انا ماليش نصيب فيها ..... ولعل في ذلك خير

وده كان الاختبار الاول وقدرت اجتازه الحمدلله

وبمنتهي الجدية بدات اسال علي الميعاد بتاع المحاضرة اللي بعدها

ولاقيت عندي ايميل بيقول ان المحاضرة يوم الخميس اللي هوا كان امبارح الساعة 9 صباحا برده

قلت بقي اكيد اكيد هحضر ان شاء الله وصاحبتي مسافرة ومش هينفع تيجي فكان لازم بجد اروح عشاني وعشانها

ولازم يوم الاربعاء ده انام بدري واخلي عندي شوية من الاحمر "الدم" عشان اعرف اصحي

المهم اني في اليوم ده اضطريت اسهر لحد 3 الفجر وكان لازم اسهر عشان كان في زميل ليا ربنا يباركله يارب ويكرمه بيحاول اخر محاولة انه يوصل لتذاكر عشان نحضر محاضرة دكتور ابراهيم الفقي ومكنش ينفع انام قبل ما اعرف هاحضر والا لا

ونمت وظبطت المنبه علي امل اني اصحي الساعة 7 وفعلا صحيت لاقتها 7 الا ربع

قلت اريح بس الربع ساعة دي واقوم 7 بالظبط

بعيد عنكم وعن السامعين والواقفين والقاعدين ببابص في الساعة بعدها بشوية لاقتها 8.30

ااااااااااااااااااااااااااااااااااااااااااااااااه تنحت للساعة المحاضرة فاضل عليها نص ساعة وانا مشواري بياخد ساعة ونص

قعدت بقي النص ساعة دي اكلم نفسي .... اروح ؟ طب لو روحت هاوصل علي 10.30 او 11 وهالاقي الدكتور خلص ويبقي روحت المشوار عالفاضي....خلاص مش هروح

بس لو ماروحتش ابقي غبت مرتين وكده هيتشال اسمي مالكورس

خلاص انا هروح وامري لله ولو كانوا خلصوا ابقي اطلع علي استقبال الباطنة واهو ابقي استفدت بحاجة

بس البالطو مش مكووووووووووووووووووووووووي والكوي هياخد وقت

ااااااااااااااااااااااااااااااااه.....اتقفلت في وشيي من كل النواحي

قلت خلاص هانزل وامري لله ولو مالاقتش في محاضرة هرجع

قعدت اتصل ببنت صاحبتي عشان اقولها اول ما الدكتور يبدا المحاضرة ترنلي.... ماردتش عليا ... طب اعمل ايه انا دلوقتي؟

قلت خلاص انا هقوم ادخل عالنت اشوف المحاضرة 9 والا لا لعل وعسي انها تكون بقت 11 روحت للكمبيوتر وانا متنرفزة جدا وباقدم رجل وباخر رجل لان خلاص مفيش فايدة الحكاية باظت باظت والكورس راح عليا

فتحت الكمبيوتر ووصلت كل حاجة تمام بابص لاقيت مافيش نت شغال وحتي التليفون مافيهوش حرارة

قلت لبابا قالي ده السلك الرئيسي مقطووووووووووووووووووع

هنا بقي صبري نفذ....وخلاص وصلت لقمة غضبي واخطات نفس خطا الراجل بتاع الكوخ المحترق

قلت خلاص المحاضرة بح راحت عليا وروحت المطبخ عملت مشروب الرجيم بتاعي ومحدش يسالني هوا عبارة عن ايه لانه مخلوط غريب عجيب في حاجات مالهاش علاقة ببعض اساسا ومن نرفزتي سبته وماشربتهوش ونمت

بعد ما صحيت بقي كان بابا صلح السلك بتاع التليفون والنت رجع قلت بقي يلا اما افتح المنتدي ابص بصة لعل وعسي

تخيلوا ايه اللي حصل........................

لاقيت مكتوب تنوييييييييييييييييه هااااااااااااااام

المحاضرة بقت يوم الاحد بدل يوم الخمييييييييييييييييييييييس

هيه هيه .... فطست علي روحي مالضحك وبقي اللي طالع عليا اني ماشية في الشقة زي العيل الصغير اللي فرحان بلعبة جديدة وعلي لساني كلمة واحدة هوا في كرم كده؟؟ يا ما انت كريم يارب...يا ما انت كريم يارب

شايفين يا جماعة قضاء ربنا.........لو كنت صحيت بدري وروحت وده طبعا من وجهة نظري انا"المخلوق الضعيف" ان ده الاحسن ليا عشان اروح في ميعادي كنت هابقي طخيت المشوار عالفاضي وكنت هروح لحد هناك وهعرف ان المحاضرة اتأجلت كنت هاتحصر

وهيجيلي تخلف عقلي وانا واقفة

لكن ربنا حبيبي اختارلي الخير

بجد بجد اعظم احساس يحسه بني ادم انه يبقي منجواه راضي بقضاء ربنا وميعترضش باي شكل من الاشكال ويقول لاي مصيبة تحصلله:

لعل في ذلك خير......

اللهم لك الحمد كما ينبغي لجلال وجهك وعظيم سلطانك

ها يا جماعة....ناوين علي ايه؟

مش ناويين بقي تطلعوا من شرنقة الحزن والزعل علي حاجة وحشة حصلت لكم(من وجهة نظركم) اللي نسجتوها حواليكم؟

مش ناوين تخلوا قلبكم ينبض باحساس الرضا بقضاء الله؟

مانجحتش السنة دي او مجبتش تقدير بتحلم بيه..... وايه يعني....لعل في ذلك خير...لسه قدامك سنين كتير اتشطر وعوض فيها

حبيبك سابك بعد ما حبيته واخلصت له.......وايه يعني .....لعل في ذلك خير....مين عارف؟؟ مش يمكن يكون هوا نصيبك بس ربنا بيختبر صبركم((يااااااااااااارب))

يارب انا راضية بقضائك في كل حاجة حصلت لي

اللهم اجرني في مصيبتي وابدلني خيرا منها

اسفة جدا اني رغييييييييييييت وطولت اوي بس مكانش ينفع ماعبرش عن كل الحاجات اللي حستها دي

اني احبكم في الله

لا اله الا الله ... سيدنا محمد رسول الله

خبر هام لكل محبى دكتور إبراهيم الفقى

السلام عليكم اصحابي .........

استكمالا لموضوع التنمية البشرية اللي بدأته في البوست اللي فات

وانا باتصفح منتدي كليتنا العزيز علي قلبي جدا

"بلاطي" www.bala6y.org

وجدت الاعلان ده وقلت اجيبه ليكم لعلنا نستفيد ان شاء الله

المهم بقي ندخل في المهم:

(فرصتك لتشارك فى أقوى وأحدث الأمسيات الجماهيرية

للمفكر والكاتب الكبير والمحاضر العالمىد.إبراهيم الفقى

أمسية:

قوة الطاقة والطريق إلى القمة

تعلم أساليب وإستراتيجيات عالمية تفتح لك الطريق إلى حياة أفضل

شارك احتفالية إفتتاح نادى النجاح

واحصل على شهادة معتمدة من المركز الكندى وموقعة من الدكتور إبراهيم الفقى

الموعد:

الخميس 31يوليو بمركز القاهرة الدولى للمؤتمرات قاعة خوفو-مدينه نصر

الساعة السادسة مساءًبإستثمار فقط 25,45,95جنية

احصل على تزكرتك من الانديه التاليه:

نادى الصيد

نادى الجزيره

النادى الاهلى بالجزيره

النادى الاهلى بمدينه نصر

نادى المعادى

نادى الشمس

وأيضاً فروع مؤمن المختلفه

للاستعلام اتصل ب:22720003---26720083---0167369389

Welcome to Ibrahim Elfiky.com...Experience The Difference

تحت رعاية المركز الكندى للتنميه البشرية

يلا قولولي مين فيكم هيحضر انا عايزة حد يشجعني ونروح سوا

مستنية ردودكم

لا اله الا الله ....سيدنا محمد رسول الله

اصنع من الليمون شرابا حلوا

السلام عليكم اعزائي .........

ازيكم عاملين ايه؟؟؟

يارب تكونوا بخير وصحة وسعادة

قبل ما ادخل في الموضوع اللي عايزة اتكلم عنه انهاردة

احب ابارك لاختي علي نجاحها وباقولها الف مليون مبروك

وعقبال يارب التخرج كده وافرح بيكي واشوفك دايما سعيدة ومبسوطة

ممكن اكون معرفتش احقق حلمي في دراستي السنة دي

بس شوفوا بقي ربنا اد ايه كريم

وعوضني عن السنة دي بنجاح اختي وفرحني بيها

والله كأني انا اللي نجحت بالظبط ...

بس برده انا طماعة

وطمعانة في كرم ربنا

انه يعوضني في دراستي السنة الجاية ان شاء الله

لو كان ده الخير ليا

وانا الحمدلله راضية بحكمه في جميع الاحوال

لان هو اللي خلقني وهو ادري مني بمصلحتي

اللهم لك الحمد كما ينبغي لجلال وجهك وعظيم سلطانك

خلينا بقي في المهم .........

وعايزة كمان ابارك لكل اصحابي في الكلية علي نجاحهم وتفوقهم في سنة رابعة ...

ربنا يارب يفرح قلبكم كمان وكمان

وتتخرجوا علي خير وتحققوا كل احلامكم

وافرح بيكم واشوفكم كده عرايس زي القمر ههههههههه

سيبكوا من الطب ده بلا كلام فارغ هههههههههههههه

سامحوني اتاخرت في اني ابارك لكم

بس ربنا وحده اللي عالم انا كنت بامر بايه ....

اللهم لا اعتراض....

وماتقلقوش اول يوم في الدراسة

كل واحدة فيكم هتشربني الحاجة الساقعة

او ممكن نقسمها شوية عليهم الحاجة الساقعة

وشوية عليهم الغدا وشوية العشا هههههههههههههههههه

وعلي فكرة انا بطلت

او بمعني اصح هابطله اليوم ده

واللي هتيجي تقولي انتي عاملة رجيم

هاعضهاااااااااااااااا

.

اللي خلاني اكتب عن الموضوع ده انهاردة

هو اني نفسي اوصل رسالة لكل اصحابي

ولاي انسان خسر حاجة كان بيحلم بيها

او خسر حد كان بيشاركه احلامه

او ربنا ماوفقهوش السنة دي

ومكانتش نتيجة امتحاناته زي ما كان بيتمناها ........

وبالاخص انا باهدي البوست ده لصديقة عزيزة عليا جدا جدا

وباقولها ماتزعليش علي اي حاجة راحت منك لسه ربنا شايل لك الخير

تفائلي يا حبيبة قلب رومي

ومش عايزة اشوفك متضايقة من حاجة احسن بجد بجد هاعضك

وطبعا الكلام ده باقوله لنفسي زي ما باقوله ليكم

خلونا نحاول سوا نطلع من اي اذمة بنمر بيها

ومانضيعش ثانية في الحزن علي حاجة بقت في الماضي

لما باكون متضايقة وحاسة انها اتقفلت في وشيي من كل ناحية

باقوم اجري علي كتاب "لا تحزن" اللي كاتبه الشيخ "عائض القرني"

اد ايه انا بارتاح للشيخ ده

واد ايه كلامه بيدخل قلبي بسرعة البرق

وبيدني امل في الحياة....

عشان كده قررت ان كل المقالات اللي جاية ان شاء الله

هتكون من كتاب "لا تحزن"

كل اللي هاعمله اني هنقل لكم الموضوع زي ما هو مكتوب بالنص في الكتاب ده

وهعلق عليه باسلوبي

وبرده اي كتاب في التنمية البشرية هيعجبني

هاجي وهاكتب لكم عنه

لاني نويت الحمدلله اني قبل ما اخد اي خطوة فعلية في دراستي

وفي تحقيق حلمي

اني ابني نفسي صح الاول ...

.يلا بقي كفاية رغي وندخل في الموضوع.......

يقول الشيخ عائض القرني:

""الذكي الاريب يحول الخسائر الي ارباح،

والجاهل الرعديد يجعل المصيبة مصيبتين.

طرد الرسول –صلي الله عليه وسلم- من مكة

فأقام في المدينة دولة ملأت سمع التاريخ وبصره.

سجن أحمد بن حنبل وجلد،فصار أمام السنة

وحبس ابن تيمية فأخرج من حبسه علما جما

ووصع السرخسي في قعر بئر معطلة فأخرج عشرين مجلدا في الفقه،

وأقعد ابن الاثير فصنف جامع الاصول والنهاية من اشهر وانفع كتب الحديث

ونفي ابن الجوزي من بغداد فجود القراءات السبع

وأصابت حمي الموت مالك بن الريب فأرسل للعالمين قصيدته الرائعة الذائعة التي تعدل دواوين شعراء الدولة العباسية

ومات أبناء أبي ذؤيب الهذلي فرثاهم بالياذة أنصت لها الدهر ،وذهل منها الجمهور وصفق لها التاريخ.

اذا داهمتك داهية فانظر في الجانب المشرق منها

واذا ناولك احدهم كوب ليمون فأضف أليه حفنة من سكر

واذا اهدي لك ثعبانا فخذ جلده الثمين واترك باقيه

واذا لدغتك عقرب فاعلم انه مصل واق ومناعة حصينة ضد سم الحيات.

تكيف في ظرفك القاسي،لتخرج لنا منه زهرا ووردا وياسمينا ،

"وعسي ان تكرهوا شيئا وهو خير لكم"

سجنت فرنسا قبل ثورتها العارمة شاعرين مجيدين متفائلا ومتشائما فأخرجا رأسيهما من نافذة السجن،فأما المتفائل نظر

نظرة في النجوم فضحك.وأما المتشائم فنظر الي الطين في الشارع فبكي.

انظر الي الوجه الآخر للمسأساة،

لان الشر المحض ليس موجودا،

بل هناك خير ومكسب وفتح وأجر.""

________

ياريت كلنا نبقي زي الشاعر المتفائل ده

ومانقعدش بقي نبكي ونحزن علي حاجة فاتت وراحت مننا

لان الثانية اللي بتعدي مابترجعش تاني

وخلاص الحزن والندم مش هيفيدوا

احنا ممكن نندم ندم ايجابي اللي يدفعنا لقدام مش اللي يشدنا لورا ............

في جملة عايزاكم تقروها كويس:

Opportunityisnowhere

عايزة كل واحد فيكم يقولي فهم ايه من الجملة دي وقراها ازاي؟

اللي متفائل وعنده امل هيشوفها

Opportunity is now here

واللي متشائم هيقراها

Opportunity is no where

مستنية اعرف قرأتوها ازاي .........

اسفة اني طولت عليكم .....وربنا يسعد ايامكم ويفرح قلوبكم قادر يا كريم

"It is never too late"

اني احبكم في الله

لا اله الا الله .......سيدنا محمد رسول الله

وحشتوني اوي اوي

سلام عليكم........
ازيكم يا اصحابي وحشتوني جدا جدا

انا مكسوفة منكم اوي ومكسوفة من نفسي اكتر واكتر لما بابص لاخر بوست كتبته والاقي نفسي استسلمت وضعفت قدام الظلم اللي اتعرضت لهوكنت قررت اني ماكتبش في المدونة تاني الا لما احس اني اقدر اواجهكم واقدر اخد قرار حاسم في حياتي لان البلوج ده الهدف منه اني اشجع نفسي واشجعكم علي النجاح وتخطي اي عقبة بتقابلنا بس صدقوني غصب عني والله انا عارفة اني كنت كئيبة اوي الفترة اللي فاتت دي وفي احد اصحابي علق علي البوست الاخير وقالي مش كل اذمة تمري بيها تعمل فيكي كده وتكتبي الكلام ده بيني وبينكم انا اتاخدت شوية من الكلام ده بس لما فكرت

لاقيت ان فعلا الكلام ده صح كل الناس بتمر بمشاكل واذمات وانا مش مفروض ابقي كئيبة كده بس انا ماليش حد غيركم اتكلم معاه وافضفض له انا باحس البلوج ده زي ما يكون بيتي اللي باعبر فيه عن كل اللي جوايا من غير خوف ....عشان كده عاوزاكم تستحملوني شوية وتبقوا دايما جنبي اينعم انا بارخم عليكم بس معلش مضطرين تستحملوني

المهم بقي يا حبايبي
انا عايزة اطمنكم علي رومي ....انا بقيت احسن كتير الحمدلله لما واجهت نفسي بالحقيقة اللي كانت غايبة عني وفتحت عنيا وشوفت الدنيا بنظر تانية خالص.... الناس اللي ظلموني وباعوني ربنا قدرني وسامحتهم بجد مسامحاهم من كل قلبي ... ماكدبش عليكم انا اتعذبت كتير لحد ما قدرت اسامح لان التمن كان غالي اوي المرادي بس معلش طول ما انا لسه باتنفس وفيا الروح هفضل احاول لحد اخر يوم في عمري

انا بقيت احسن بفضل ربنا طبعا لانه بيحط في طريقي ناس يعوضوني عن اللي خسرتهم زي صاحبتي "موءة" لما عرفتها ندمت علي كل يوم عشته من قبل ما اعرفها ربنا يخليهالي وتفضل جنبي علي طول

هههههههههه طبعا بتسالوني باضحك علي ايه ؟
اصلي امبارح خرجت انا وهبة"بوبا" نزلت نشتري شوية حاجات كده
كان بقالي شهور كتير اوي ماشوفتهاش وكنت متخيلة اني اول ما اشوفها هترمي في حضنها واقعد اعيط واحكيلها عن كل اللي شايلاه في قلبي بس الغريب في الموضوع اني اول ما شوفتها ماعرفش ايه اللي جرالي لاقيت الابتسامة اترسمت علي وشيي من الودن دي للودن التانية ههههههههه

تعرفوا...لما شوفت ابتسامة هبة مابقتش محتاجة اني احكي عن اي حاجة وجعتني لان مجرد وجودها جنبي ومعايا وعنيها تيجي في عنيا كافي انه يداويني من اي الم .... برغم اني جيت في الاخر واحنا في المواصلات ومروحين كنت هضعف وابين اللي جوايا بس مسكت نفسي لان بوبا عروسة وفرحانة وانا فرحانة بيها اكتر منها وفرحتي بيها ساعدتني كتير اني اخرج من حالتي.... عارفين لما تبقوا كده بتحبوا حد اوي وتشوفوا ابتسامة علي وشهه والا تسمعوا صوت ضحكته يا سلام تحسوا انكم ملكتوا الدنيا وما فيها

بلاش كئابة بقي ....احكيلكم علي موقف طريف حصل ........
بعد ما بوبا نزلت من العربية مفروض اني اركب عربية تانية المهم اني ركبت واحنا بصراحة لافينا كتير اوي لما خلاص رجلي وضهري كانوا اتكسروا انا وهي ماكوناش عايزين نروح ونسيب بعض
في العربية دي المفروض اني بافتح الشنطة وباطلع الاجرة عشان اديها للشخص اللي بيجمعها بصيت في الشنطة لاقيت جنيهات كده جنب بعضها فحطيت ايدي وطلعت واحد من غير ما ابص وانا اساسا دماغي كانت فاصلة وباديه للي قدامي وباقوله واحد من الجنيه راح بيقولي متاكدة انه واحد؟؟!!! انا استغربت وتنحت كده وقلت له ايوة واحد قالي طب خدي شوفي معاكي فكة وبصيت له اتاريني اديته ورقة مقطوعة من النتيجة بدل الجنيه هههههههههههههههههه لاقيته مسخسخ مالضحك وانا وشيي بقي جاب الوان وقلت له والله مخدتش بالي قالي اه منا واخد بالي ويضحك
هههههههههههههههه بجد كان موقف مضحك وحمدت ربنا ان هبة كانت نزلت لانها لو ماكانتش نزلت كنا ضحكنا ضحك مش طبيعي وكنا هنروح في داااااااااااااااهية..............................

معلش رغيت وطولت عليكم بس اصلي كان نفسي احكي معاكم اوي
خلاص بقي مافيش تفكير في اللي فات ومافيش زعل علي اللي راح
عايزاكم بس تدعولي اني انسي وان ربنا يهديني ويقربني منه ويخليلي اصحابي اللي واقفين جنبي بجد

وانا دلوقتي باحاول اشغل نفسي بحاجات كتير في مجال دراستي وغيره عشان اقدر انسي لاني خلاص مش عايزة افتكر اللي راح ولا هاعيش عذابه تاني ولا هسلم قلبي لحد مايستاهلهوش

وفي موضوع كده عايزة اخد رايكم فيه بس خليه بقي المرة الجاية احسن كده انا هتقطع .......والله مش عارفة ابطل ابقي رغاية

صحيح....عايزة اشكر الناس اللي ردوا علي البوست اللي فات وشجعوني وباعتذر بجد اني ماقدرتش ارد عليهم لاني كنت في حالة صعبة باعمل input من غير output

شكرا يا موءة ويا بوبا ويا نعكوشة

ربنا يخليكم ليا يارب

وحشتوني ..........بحبكم في الله

لا اله الا الله.....حبيبي محمد رسول الله