فك التكشيرة.....ماعندناش وقت نضيعه في الزعل

السلام عليكم ورحمة الله وبركاته،،،،،،،،

بجد بجد وحشتوني جدا جدا
والكتابة في البلوج وحشتني اوي
ووحشني اني اسمع تشجيعاتكم ليا

انتم بجد ما تتخيلوش تعليقاتكم دي كانت بتقويني وبتشجعني اد ايه ولما كنت بازهق مالمذاكرة وافقد الامل كنت باعمل حاجتين

اقرا قران واجي وافتح البلوج واشوف انتم اد ايه بتحبوني وبتدعولي وابقي نفسي افرحكم ....يارب نفرح سوا بالتقدير يارب

المهم بقي.......

انا كان نفسي احكيلكم عن اللي حصل ليا الفترة اللي فاتت بس اعذروني لضيق الوقت بس هاحكيلكم ان شاء الله باستفاضة بعد ما الفترة دي تعدي علي خير(ياااااااااااااارب)

برغم الوقت الصعب اللي بنمر بيه كلنا دلوقتي عشان الامتحانات بصراحة ماقدرتش امسك نفسي قدام الصورة دي وجمالها وكم المعاني الجميلة جدا اللي بتحملها واللي حسيتها في كل لون من الوانها...........
وبصراحة كمان بقي انا باتلكك عشان اكتب في البلوج ههههههههه

ركزوا كده كويس في الصورة......شايفين ايه؟
انا اول حاجة وقعت عليها عنيا في الصورة دي.....الابتسامة اللي علي وجوه الناس دي

ومعتقدش انهم في موقف يخليهم يضحكوا او يبقوا مبسوطين كده

الواضح ان الصورة دي مرسومة .... انا معرفش مين اللي راسمها بس هي جاتلي علي الفيس بوك
واللي راسمها عايز يوصلنا رسالة مهمة جدا جدا ...... انا فضلت متنحة للصورة دي حوالي ربع ساعة
وهاقولكم انا حسيت ايه منها:

حسيت ان اللي راسمها عايز يقولنا ....ان الدنيا مابتخلاش من المشاكل
وكل واحد فيا عنده مشاكله....لان يا جماعة الدنيا ماينفعش تمشي كده سهلة و smooth
والا الدنيا مش هتبقي دنيا.....الدنيا دي دار ابتلاء واختبار صعب جدا احنا لازم نحاول ننجح فيه بكل طاقتنا عشان ندخل الجنــــــــــــــــــــــة

بس مش معني اننا عندنا مشاكل اننا نخليها تسيطر علينا وعلي حياتنا ونكتئب بقي ونتقوقع وننعزل
او نخليها تعطلنا عن تحقيق احلامنا واهدافنا اللي هي غذاء ارواحنا وانا باعتبر ان احلامي هي الوقود اللي بيدفعني وبيدني الطاقة اني استمر واعيش واعدي من اي مشكلة

ليه بنمشي مكشرين؟؟؟؟ ......
عندنا مشاكل؟؟.....اه عندنا مشاكل....
.بس الناس اللي عايشين في وسطنا دوول هما كمان اكيد عندهم مشاكل....
.ووممكن يكونوا ماشيين مستنيين يشوفوا حد بيضحك او يبتسم عشان يحسوا ان في شوية امل

خليني احكيلكم موقف......

مرة كنت في المترو وانا قاعدة لاقيت بنت ما شاء الله عليها وشها هادي جدا بس مع الاسف جمال وشها ضايع في تكشيرة مالهاش حل وصعبة جدا ..... انا بقيت عمالة افكر طب اعمل ايه واتصرف ازاي؟ اروح اكلمها؟ طب ما هي ممكن تكسفني طب والحل؟......المهم بصيت لها اوي ومرة واحدة ابتسمت ليها.....راحت هي كمان مبتسمة .... هي افتكرت اني باشبه عليها وانا ولا اعرفها اساسا ههههه بس اد ايه فرحت انها باتسمت....

ودي بقي الحاجة التانية اللي حستها من الصورة دي.....
ان مش معني اننا عندنا مشاكل او ان حصل معانا موقف نقوم بقي نفقد الثقة بنفسنا وماننساعدش الناس ...
ونقول احنا اللي فينا مكفينا.....

لالالالالالا....

ده اكبر غلط ....!!!!!!!!!

واضح مالصورة انهم فقراء وانهم 8 افراد نايمين علي سرير واحد ....ومع ذلك عندهم مكان للكلب بتاعهم وكمان القطة وكمان الفرخة كوكوكوكوكوكو هههههههه.....يعني كل الظروف اللي بيمروا بيها واللي الفنان اللي رسم الصورة دي ابدع في التعبير عنها مامنعتهمش انهم يبتسموا ويرضوا بقضاء ربنا ....ويقولوا للدنيا برضه هنبتسم ونتفائل

مش مفروض نفقد الثقة بنفسنا....
ابدا ابدا مهما حصل ....
.انت كبني ادم لسه فيك نفس وعايش تقدر مثلا تخلي طفل صغير يضحك ويبتسم

تقدر مثلا تبوس ايد والدك ووالدتك وتعبر لهم انت اد ايه بتحبهم(اللهم ارحمهما كما ربياني صغيرا) امين امين امين

لما تكتئب وتحس انك غرقان في المشاكل......ممكن تعمل حاجة بسيطة اوي

روح اي مستشفي قريبة من بيتك...
.وبايدك الجميلة دي طبطب علي راس طفل صغير......
او روح لواحد كبير في السن واعطف عليه بكلمتين حلوين وشوف هوا عايز ايه واعملهوله...
.الطريقة دي عن تجربة....هتخرج شايف كل حاجة بمبي لسببين الاول ان برغم المشاكل اللي عندك قدرت تقف جنب الناس دي وتحس انك عملت حاجة حلوة ثوابها عظيم عند ربنا والتاني انك هتحمد ربنا علي نعمة الصحة اللي ناس كتيييييرة اوي محرومين منها.....

الحمدلله الحمدلله الحمدلله علي نعمة الصحة والعافية

في رأيي الشخصي الدنيا دي عبارة عن سلسلة من الصدمات اللي بنعيشها والشاطر اللي مايستسلمش ويعرف ازاي يضحك ويفرح اللي حواليه ويحقق احلامه ويقول للدنيا يا انا يا انتي وانا هاعرف ازاي ارضي ضميري وارضي ربنا ومش هاسيبك تدوسي عليا ابدااااا

قولولي بقي حسيتوا بايه لما شوفتوا الصورة دي......؟؟؟؟؟
وعايزة بجد اشكر اللي رسم الصورة دي لانه خلاني اتفائل وعلمني ازاي ابتسم واتعايش مع المشاكل

وطبعا كالعادة .... هاطمع في حبكم ليا واطلب منكم انكم تدعولي احقق حلم عمري.....لاني بجد محتاجة دعواتكم دي جدا
انا متضايقة عشان مافيش وقت اني ارغي وارغي وارخم عليكم عالعادة ههههههه
والا انا رغيت؟؟؟ والا ايييييييه؟؟؟

الحمدلله.......
عدد ما كان......
وعدد ما يكون.....
وعدد الحركات والسكون

ان تابوا فأنا حبيبهم....وان أبوا فأنا طبيبهم

(اني والانس والجن في نبأ عظيم

اخلق ويعبد غيري ... ارزق ويشكر سواي
خيري الي العباد نازل ... وشرهم الي صاعد
اتودد اليهم بالنعم ... وانا الغني عنهم
ويتبغضون الي بالمعاصي ... وهم افقر مايكونوا الي
اهل ذكري اهل مجالستي
فمن اراد ان يجالسني فليذكرني
اهل طاعتي اهل محبتي
اهل معصيتي لا اقنطهم من رحمتي
ان تابوا فانا حبيبهم
وانا ابوا فانا طبيبهم
ابتليهم بالمعاصي لاطهرهم من المعايب
من اتاني منهم تائبا تلقيته من بعيد
ومن اعرض عني ناديته من قريب
اقول له: اين تذهب؟ الك رب سواي؟
الحسنة عندي بعشر امثالها وازيد
والسيئة عندي بمثلها واعفو
وعزتي وجلالي لو استغفروني منها لغفرت لهم)

يااااه ......هوا فيه كرم كده؟؟.....

.في حد ممكن يبقي حنين علينا اوي كده زي ربنا؟؟؟

اصل هوا اللي خلقنا ومستحيل انه يسيبنا في اذمة من غير ما يفرجها علينا

صحيح احنا بنمر بمشاكل في حياتنا وحاجات ممكن تعوقنا اننا نحقق اهدافنا بس ده بيبقي اختبار من ربنا

عايزيشوفنا هندعي ونقول:

يارب احنا راضيين بقضاءك ومش هنستسلم والا لا

والله يا جماعة اجمل احساس ممكن يحسه بني ادم

هو احساس الرضا بقضاء الله

الحديث القدسي ده من اجمل الحاجات اللي بالجأ لها لما اكون مكتئبة او متضايقة بيديني امل كبير اوي في الحياة وباحس ان باب رحمة ربنا مفتوح ليا في اي وقت وانه عمري مما هيسبني ابدا

هااااا يا جماعة بعد الحديث ده ناوين علي ايه؟؟؟؟

ناوين برده نفضل كده خايفين اننا نحاول لمجرد انا لو حاولنا ممكن نفشل !!!!!!!!!!!!!!!

طيب شوفوا الحديث القدسي ده كده:يا عبادي.....

اني حرمت الظلم علي نفسي وجعلته بينكم محرما فلا تظالموا،

يا عبادي

كلكم ضال الا من هديته فاستهدوني اهدكم،

يا عبادي

كلكم جائع الا من اطعمته فاستطعموني اطعمكم،

يا عبادي

كلكم عار الا من كسوته فاستكسوني اكسكم

يا عبادي

انكم تخطئون بالليل والنهار وأنا اغفر الذنوب جميعا فاستغفروني اغفر لكم،

يا عبادي

انكم لن تبلغوا ضري فتضروني ولن تبلغوا نفعي فتنفعوني

يا عبادي

لو أن أولكم وآخركم وانسكم وجنكم كانوا علي أتقي قلب رجل واحد منكم ما زاد ذلك في ملكي شيئا،

يا عبادي

لو أن أولكم وآخركم وانسكم وجنكم كانوا علي أفجر قلب رجل واحد منكم ما نقص ذلك من ملكي شيء،

يا عبادي

لو أن أولكم وآخركم وانسكم وجنكم قاموا في صعيد واحد فسألوني فأعطيت كل واحد مسألته ما نقص ذلك مما عندي الا كما ينقص المخيط اذا ادخل البحر،

يا عبادي

انما هي اعمالكم احصيها لكم ثم اوفيكم اياها فمن وجد خيرا فليحمد الله ومن وجد غير ذلك فلا يلومن الا نفسه)

واخدين بالكم من كلمة يا عبادي دي؟.........

حسيتوا بايه وانتم بتقروها؟

انا دمعت و حسيت بحنان ربنا وعطفه عليا واد ايه هوا بيحبني وهيكرمني يااااااااااااااااااااارب

واد ايه ندمانة علي كل لحظة من حياتي عشتها وانا مادقتش طعم حب الله مش اني اعبده بس عشان خايفة من عقابه وعشان هوا ربي لا دلوقتي باعبده لاني باحبه

اللهم ارزقني حبك وحب من احبك وحب عمل يقربني لحبك

ربنا عنده خير كتييييير اوي لينا بس احنا نجتهد ونتوكل عليه

انت يا شاب ياللي متخرج ومعاك تعليم عالي ومكتفي بشغل بسيط

اتعلم وخد كورسات واسعي واسعي واسعي وتوكل علي اللي خلقك وانتظر منه فرج قرييييييييييييب

غلطنا وضيعنا وقت كتير؟؟.............

اه غلطنا وضيعنا وقت

بس ربنا اقسم بعزته وجلاله اننا لو رجعنا بنية صافية وتوبة نصوحة ودعينا بقلب ماليان بحبه واخدنا بالاسباب وعملنا اللي علينا هيغفر لنا وهيرزقنا من حيث لا نحتسب

طولت عليكم؟؟؟......

اكيد كلكم بتقولوا اااااااااااه من الاعماق

طيب طيب...بس عايزة اقولكم ايه اللي خلاني اكتب عن الموضوع ده دلوقتي بصراحة هما موقفين

انتو عارفين اني لما عملت المدونة وكتبت اول بوست كان اليوم اللي قبل امتحاناي اللي هوا الاحد بس الفجر وساعتها قررت اني هاجتهد واتمسك بحلمي بس الوقت كان ضيق جدا لاني اضطريت انزل الكلية يوم الاحد بس ربنا بعتلي رسالة حلوة اوي عشان اثبت علي طريقي وفعلا رجعت وبدات اذاكر والحمدلله اللي خلصته حليت فيه كويس بس اللي ملحقتش اذاكره مع الاسف محلتش كويس بالاضافة ان الاستمحان كان شديد مين بقي اللي جالي ساعتها؟

الشيطاااااااااان قعد يوسوسلي ويقولي انت كنت عايزة تنجحي وتحققي املك ادي النتيجة ملحقتيش تذاكري ومحلتيش كويس خلاص بقي سيبك مفيش فايدة فات الوقت خلاص .....

ماكدبش عليكم استسلمت للكلام ده لبعض الوقت واكتئبت فعلا بس جريت علي الحديث القدسي ده وعلي مصحفي وقعدت اقرا اقرا وبقيت احسن الحمدلله وهكمل وجيت كتبته ليكم عشان نشجع بعض

الموقف التاني شخصية عزيزة عليا والشخصية دي محبطة جدا جدا انا اهو باقولها الامل دايما موجود

انا باعتذر لكم اني مش هقدر اكتب اي بوستات الفترة الجاية عشان خاطر الاستمحان

وعشان احقق حلمي وحلمكم...مش هوا حلمكم برده؟ ربنا يقدرني ويقدركم ونحقق كل احلامنا

هانت والاجازة هتيجي وهاهريكم ههههههههههههه

بس ميمنعش اني اجي اغلس عليكم لما ازهق مالمذاكرة وافضفض معاكم بكلمتين واذكر نفسي واذكركم

ان الامل دايما موجود

"لا تحسبن المجد تمرا انت اكله

لن تبلغ المجد حتي تلعق الصبر"

واخيرا باطلب منكم طلب...اطمعوا في كرم ربنا اوووووووووووووووووووووووووووي اسعوا واعملوا اللي عليكم ووكلو ربنا سبحانه وتعالي هتلاقوا كل حاجة ماشية جميل وحلوة

محتاجة دعواتكم جدا

هتوحشوني اوي

لا الـــــــــــــــــــــــــــــه الا اللـــــــــــــــــــه

سيدنا محمــــــد رســـــــول اللــــــــــــــــه

No pain ....................No gain

لا لليأس

السلام عليكم ورحمة الله وبركاته,,,

انا متلغبطة جدا ومش عارفة ابدأ منين انا ماجربتش اكتب قبل كده او بمعني اصح مش متخصصة في مجال الكتابة والقراءة والحاجات الخطيرة دي ههههههه.

مع الاسف طبيعة الدراسة بتخلي الواحد كتير يبعد عن حاجات هوا بيحبها بس الفضل يرجع لهبة صاحبتي بعد ربنا لان بوجودها في حياتي عرفت حاجات كتير مكنتش اعرفها وبدأت احس اني مش عايشة للطب وبس ومن ضمنها المدونة......انا مكنتش اعرف يعني ايه مدونة ولا كنت باحب اقرا كلام علي الكمبيوتر بس لما تعمقت في الموضوع حبيته جدا جدا لان الواحد من خلال الحاجات الجميلة دي بيقدر يستفيد من خبرات الناس اللي حواليه ويتعلم منهم.

بس هوا الغريب في الموضوع ان التوقيت اللي انا قررت اعمل فيه المدونة دي توقيت قاتل جدا جدا لاي طالب طب وهو شهر 5 شهر الفزع والكوابيس المليئة بالامتحانات ......بس خلوني احكيلكم انا ايه خلاني اخد القرار ده.

كتير الانسان بيمر بظروف صعبة في حياته والظروف دي بتعطله عن تحقيق احلامه وكتير الانسان بيضحي باحلامه لما يحس انه هيبقي اسعد لما يساعد غيره في تحقيق احلامه......انا مش عارفة صح والا لا ان الانسان يعمل كده بس اللي انا واثقة منه ان اي انسان لما بيفوق علي واقع انه ماقدرش يحقق حلمه بيبقي الواقع أليم جدا جدا بغض النظر عن السبب كان ايه ووخاصة لو كان الحلم اللي هيحققه ده مش حلمه هوا لواحده لا ده حلم نااااااااااس كتييييير اوي بتحبه وبتفرح لفرحه

اد ايه احساس سيء ان الانسان يحس انه خذل نفسه وانه ماوقفش صامد قدام الظروف وقال يارب الحمد لله انا راضي بحكمك وهاصبر

وهاحاول مرة واتنين ومليون........

انا مش هوجع دماغكم بالظروف دي.....بس خلينا في النتيجة الا وهي

(اني لاقيت نفسي فاضل شهرين علي امتحانات اخر السنة وانا عندي 4 مواد تقدروا تقولوا ان اللي اعرفه فيهم ماينجحنيش)

حسيت بالاحباط وان خلاص مفيش فايدة وحسيت ان مفيش حاجة حواليا مشجعاني اني احاول وكل اللي حسيته ان خلاص سنة رابعة راحت مني وكانت نتيجة الاحساس بالاحباط ده ان الشهرين بقوا

شهر......!!!!

طبعا لما صحيت عالواقع الاليم ده حسيت باحباط زيادة وان خلاص مفيش فايدة لدرجة اني فكرت أأجل السنة كلها بس سبحان الله ربنا كريم جدا وامبارح بعتلي رسالة اللي بيها بيقولي حاولي ماتيأسيش قمت اتوضيت وصليت وبكيت وندمت علي السنة اللي راحت مني وقريت كتاب "لا تحزن" من احب الكتب الي قلبي وبجد اد ايه فرق معايا الكتاب ده وحسيت ان لسه فيه امل وان المفروض الواحد مايبصش وراه واكتر فقرة عجبتني فيه هي فقرة(يومك...يومك) وملخصها ان الانسان يعيش يومه من غير ما يفكر في اللي فات ولا حتي يفكر في اللي جاي لان مجرد التفكير ده هيسرق اللحظة اللي هوا عايشها دلوقتي الصح اننا نفكر ازاي نستغل كل لحظة عايشنها حالا اننا نعمل عمل نتقرب بيه لربنا ونزود حسناتنا.............

الفجر بيأذن دلوقتي واد ايه انا فرحانة لان الفجر ده بداية حياة جديدة هاعيشها لطاعة ربنا وللمرضي وخلاص مش هفكر في اللي فات ولا هشغل دماغي باللي جاي وهاحاول بكل قدرتي وطاقتي اني ماضيعش سنة رابعة وانا كلي ثقة في حبيبي (الله) انه مش هيضيع تعبي صحيح انا غلطت وبجد ندمانة بس ربنا قال في الحديث القدسي:

(من تقرب الي شبرا تقربت اليه ذراعا ومن تقرب الي ذراعا تقربت اليه باعا ومن اتانى يمشي اتيته هرولة) ......

لا اله الا انت سبحانك اني كنت من الظالمين

هدف مدونتي ان اساعد نفسي واساعد اي حد عايز ينجح وعايزاكم انتو كمان تساعدوني ولو اليأس جه وخبط علي بابنا نقوله لا خلاص احنا ناس مؤمنين بالله منعرفش حاجة اسمها يأس

(اللهم لا تزغ قلوبنا بعد اذ هديتنا وهب لنا من لدنك رحمة)

وكمان هاجيب اي لينكات لمعلومات طبية او حاجة تخص مناهجنا او اي اخبار عن الاستمحانات

وكبداية ده لينك عن كيفية المذاكرة والتغلب علي الزهق والملل منها http://www.studygs.net/arabic/index.htm

وهيبقي اغلب الموضوعات عن التنمية البشرية وعن المواقف اللي بامر بيها في حياتي ويشرفني انكم تشاركوني بآرائكم

معلش طولت عليكم (اصلي رغاية شوية ..بصراحة هما شويتين) ادعولي وادعوا لكل طلبة الطب عندنا امتحانات الاسبوع ده لاخر مادة درسناها في العملي السنادي بالنسبة ليا هي (الطب الشرعي) ويارب يكون الامتحان ده بشرة خير للي جاي ...امين امين.انا في انتظار تعليقاتكم وهي اللي هتشجعني اذا كنت اكمل كتابة في المدونة والا لا

(اللهم ارحمنا فأنت بنا راحم...ولا تعذبنا فأنت علينا قادر)

اني احبكم في الله