نقدر؟......طبعا نقدر: فك التكشيرة.....ماعندناش وقت نضيعه في الزعل

الأربعاء، 28 مايو 2008

فك التكشيرة.....ماعندناش وقت نضيعه في الزعل

السلام عليكم ورحمة الله وبركاته،،،،،،،،

بجد بجد وحشتوني جدا جدا
والكتابة في البلوج وحشتني اوي
ووحشني اني اسمع تشجيعاتكم ليا

انتم بجد ما تتخيلوش تعليقاتكم دي كانت بتقويني وبتشجعني اد ايه ولما كنت بازهق مالمذاكرة وافقد الامل كنت باعمل حاجتين

اقرا قران واجي وافتح البلوج واشوف انتم اد ايه بتحبوني وبتدعولي وابقي نفسي افرحكم ....يارب نفرح سوا بالتقدير يارب

المهم بقي.......

انا كان نفسي احكيلكم عن اللي حصل ليا الفترة اللي فاتت بس اعذروني لضيق الوقت بس هاحكيلكم ان شاء الله باستفاضة بعد ما الفترة دي تعدي علي خير(ياااااااااااااارب)

برغم الوقت الصعب اللي بنمر بيه كلنا دلوقتي عشان الامتحانات بصراحة ماقدرتش امسك نفسي قدام الصورة دي وجمالها وكم المعاني الجميلة جدا اللي بتحملها واللي حسيتها في كل لون من الوانها...........
وبصراحة كمان بقي انا باتلكك عشان اكتب في البلوج ههههههههه

ركزوا كده كويس في الصورة......شايفين ايه؟
انا اول حاجة وقعت عليها عنيا في الصورة دي.....الابتسامة اللي علي وجوه الناس دي

ومعتقدش انهم في موقف يخليهم يضحكوا او يبقوا مبسوطين كده

الواضح ان الصورة دي مرسومة .... انا معرفش مين اللي راسمها بس هي جاتلي علي الفيس بوك
واللي راسمها عايز يوصلنا رسالة مهمة جدا جدا ...... انا فضلت متنحة للصورة دي حوالي ربع ساعة
وهاقولكم انا حسيت ايه منها:

حسيت ان اللي راسمها عايز يقولنا ....ان الدنيا مابتخلاش من المشاكل
وكل واحد فيا عنده مشاكله....لان يا جماعة الدنيا ماينفعش تمشي كده سهلة و smooth
والا الدنيا مش هتبقي دنيا.....الدنيا دي دار ابتلاء واختبار صعب جدا احنا لازم نحاول ننجح فيه بكل طاقتنا عشان ندخل الجنــــــــــــــــــــــة

بس مش معني اننا عندنا مشاكل اننا نخليها تسيطر علينا وعلي حياتنا ونكتئب بقي ونتقوقع وننعزل
او نخليها تعطلنا عن تحقيق احلامنا واهدافنا اللي هي غذاء ارواحنا وانا باعتبر ان احلامي هي الوقود اللي بيدفعني وبيدني الطاقة اني استمر واعيش واعدي من اي مشكلة

ليه بنمشي مكشرين؟؟؟؟ ......
عندنا مشاكل؟؟.....اه عندنا مشاكل....
.بس الناس اللي عايشين في وسطنا دوول هما كمان اكيد عندهم مشاكل....
.ووممكن يكونوا ماشيين مستنيين يشوفوا حد بيضحك او يبتسم عشان يحسوا ان في شوية امل

خليني احكيلكم موقف......

مرة كنت في المترو وانا قاعدة لاقيت بنت ما شاء الله عليها وشها هادي جدا بس مع الاسف جمال وشها ضايع في تكشيرة مالهاش حل وصعبة جدا ..... انا بقيت عمالة افكر طب اعمل ايه واتصرف ازاي؟ اروح اكلمها؟ طب ما هي ممكن تكسفني طب والحل؟......المهم بصيت لها اوي ومرة واحدة ابتسمت ليها.....راحت هي كمان مبتسمة .... هي افتكرت اني باشبه عليها وانا ولا اعرفها اساسا ههههه بس اد ايه فرحت انها باتسمت....

ودي بقي الحاجة التانية اللي حستها من الصورة دي.....
ان مش معني اننا عندنا مشاكل او ان حصل معانا موقف نقوم بقي نفقد الثقة بنفسنا وماننساعدش الناس ...
ونقول احنا اللي فينا مكفينا.....

لالالالالالا....

ده اكبر غلط ....!!!!!!!!!

واضح مالصورة انهم فقراء وانهم 8 افراد نايمين علي سرير واحد ....ومع ذلك عندهم مكان للكلب بتاعهم وكمان القطة وكمان الفرخة كوكوكوكوكوكو هههههههه.....يعني كل الظروف اللي بيمروا بيها واللي الفنان اللي رسم الصورة دي ابدع في التعبير عنها مامنعتهمش انهم يبتسموا ويرضوا بقضاء ربنا ....ويقولوا للدنيا برضه هنبتسم ونتفائل

مش مفروض نفقد الثقة بنفسنا....
ابدا ابدا مهما حصل ....
.انت كبني ادم لسه فيك نفس وعايش تقدر مثلا تخلي طفل صغير يضحك ويبتسم

تقدر مثلا تبوس ايد والدك ووالدتك وتعبر لهم انت اد ايه بتحبهم(اللهم ارحمهما كما ربياني صغيرا) امين امين امين

لما تكتئب وتحس انك غرقان في المشاكل......ممكن تعمل حاجة بسيطة اوي

روح اي مستشفي قريبة من بيتك...
.وبايدك الجميلة دي طبطب علي راس طفل صغير......
او روح لواحد كبير في السن واعطف عليه بكلمتين حلوين وشوف هوا عايز ايه واعملهوله...
.الطريقة دي عن تجربة....هتخرج شايف كل حاجة بمبي لسببين الاول ان برغم المشاكل اللي عندك قدرت تقف جنب الناس دي وتحس انك عملت حاجة حلوة ثوابها عظيم عند ربنا والتاني انك هتحمد ربنا علي نعمة الصحة اللي ناس كتيييييرة اوي محرومين منها.....

الحمدلله الحمدلله الحمدلله علي نعمة الصحة والعافية

في رأيي الشخصي الدنيا دي عبارة عن سلسلة من الصدمات اللي بنعيشها والشاطر اللي مايستسلمش ويعرف ازاي يضحك ويفرح اللي حواليه ويحقق احلامه ويقول للدنيا يا انا يا انتي وانا هاعرف ازاي ارضي ضميري وارضي ربنا ومش هاسيبك تدوسي عليا ابدااااا

قولولي بقي حسيتوا بايه لما شوفتوا الصورة دي......؟؟؟؟؟
وعايزة بجد اشكر اللي رسم الصورة دي لانه خلاني اتفائل وعلمني ازاي ابتسم واتعايش مع المشاكل

وطبعا كالعادة .... هاطمع في حبكم ليا واطلب منكم انكم تدعولي احقق حلم عمري.....لاني بجد محتاجة دعواتكم دي جدا
انا متضايقة عشان مافيش وقت اني ارغي وارغي وارخم عليكم عالعادة ههههههه
والا انا رغيت؟؟؟ والا ايييييييه؟؟؟

الحمدلله.......
عدد ما كان......
وعدد ما يكون.....
وعدد الحركات والسكون

هناك 10 تعليقات:

غير معرف يقول...: بجد تسلم ايدك يا ريهام على هذا الكلام وبحب اعلق بشي بسيط بالنسبه للتكشيره ( الاحزان أو الألم ) وكما قال كاظم من كلمات نزار قبانى
ان الانسان بلا حزن ذكرى اناس يعنى اكيد كل منا بداخله حزن ولكن يجب ان لا يتملكه الحزن أو يقتله أو يصل بحزنه الى الأكتئاب أو الدمار يعنى الدنيا جميله وأيضا مليئه بالاحزان انا براي يجب أن نعدل بين حزننا وفرحنا .
بالفعل يا ريهام من الصعب ان تكون حياتنا مجرد أحزان، أو مجموعة أحزان بتحيط فينا من كل جانب بنلاقيها وين ما رحنا بالفعل اصعب شي انك بتلاقي الناس بينضروا أليك وكأنك أنت عنوان أحزانهم او من الصعب من أراد أن يحزن ينظر إليك فيحزن من أراد أن يتألم ينظر إليك فيتألم وكأنك أصبحت تماثل لأحزان الناس من حولك.

ربما أنت أصبحت عنوان لأحزان العالم من حولك !!

أسئل الله أن ينهى احزننا وأن يعيد الفرح بقلوبنا; 28 مايو 2008 في 2:16 م
هبههههووب يقول...: عودوٌ احمد يا رومى
تعرفى انى لما شفت الصورة دى فعلا ابتسمت ولما ركزت فيها عرفت انى مبتسمتش علشان شوفت صورة فكاهية
لأ علشان فعلا الابتسامه مرسومه على وجوة ابطالها
فعنيهم الرضا والحب والحنان ومعانى كتير جميله تتحس متتشافش
----
فعلا يا رومى انا كمان لو كنت مضايقه وشوفت ضحكه ف عين حد بفرح اوى ..وخصوصا لو كان الحد دا طفل صغير
---
الحياة فعلا زى ما قلتى كلها اختبارات
وفعلا السعادة هى اللحظه الراهنه
وهى رحله فعلا وليست محطه وصول ونتدور عليها
السعادة حياة كلنا عايشينها ...عايشها الى بينام على سرير لوحدة ف قصر وعايشها يمكن بطعم احلى كمان الى عايشين ونايمين 10 على سرير واحد
يمكن حاسين بدفا بعض...بيحسوا بعض
الى عايز يكون سعيد بيكون
----
انتى عارفه ان الدنيا ملخبطه معايا اليومين دول ...ومخنوقه شويه
الا انى لما قريت كلامك وافتكرت افيد اميل وصلنى ف حياتى الالكترونيه
وهو بعنوان لا يوجد وقت لللعيش بسعادة افضل من الان
وساعتها بصيت ف المرايه ووهمت نفسى انى مبسوطه وسعيدة ...{غم انى ف عز خنقتى ....والله بجد حسيت ان فى فرحه دخلت قلبى ...مجرد انى فكرت احسس نفسى واوهمها بالسعادة
-----
انا مش عارفه اقول ايه
انتى فعلا مواضيعك شيقه وجميله وبتلمسنى اوى يا حبى
وكأنك بتكلمينى بحسك اوى وبتخيلك قدامى
ربنا يقرب البعيد...واشوفك عن قريب
يارب امين; 28 مايو 2008 في 4:20 م
غير معرف يقول...: لو كانت السعادة بالمال ماكنت أنا ولا أنتي...السعادة تكون حين تلمس القلوب القلوب فتري الكون بمنظار لايري سوي السعادة والحب.لايري سوي عيون هائمة تبحث عن معني الحياة..الحب لايعني سوي السعادة..حب الحياة وحب الأوطان
حب الخير وحب البشر وحب القمر
حب العمل وحب القدر
تعلمت معني السعادة من آلامي وأحزاني..علمني الألم أن السعادة لاتقدر بثمن وأن نظرة سعادة في العيون تساوي كل الحياة..
...................................
حلو أوي الموضوع وأسلوبك جميل في التعبير
بتوصلي للناس بسهولة وبتعبري بأسلوب جميل وكأنك بتكلمي كل شخص لوحده..وعلي فكرة مش أي حد يقدر يعمل كده..كملي وماتبطليش كتابة .الكلية دي قتلت فينا حاجات كتير جميلة بس أنا دلوقتي رجعت أحاول أستعيدها; 29 مايو 2008 في 3:34 م
روووومي يقول...: سلام عليكم ...اصحابي
مايا.....
ميرسي يا ميوشة عالكومنت الجميل ده وانتي فعلا معاكي حق المفروض الواحد يعدل بين حزنه وفرحه ومايسبش الاحزان تسيطر عليه

هبهوب(بوبا)......حبي
بصي يا هبة انتي بالذات ماينفعش اشوفك مكشرة لان انتي من الناس اللي انا باستمد منهم قوتي في الدنيا دي بعد ربنا سبحانه وتعالي، ولا هاقدر اشوفك مخنوقة....انا بجد متضايقة من الامتحانات دي لانها مش مخليانا عارفين نتقابل وانا والله محتجالك اكتر ما اتي محتجالي بس خلاص هانت يا حبي والامتحانات تخلص ونشوف بعض ونرغي وهاوجع دماااااغك بس انتي استحمليني بس
تفائلي يا هبة ماتسيبيش لحظة من عمرك تضيع في حزن علي اي شيء

د/احمد قدح....
انا سعيدة جدا انك قرأت مدونتي....وباين عليك شاعر جامد جدا جدا وعجبتني اوي جملة (نظرة سعادة في العيون تساوي كل الحياة)
في دي معاك حق جدا جدا....مافيش اجمل من انك تشوف بسمة علي وج انسان وخاصة لو كان طفل
اتمني اني اعرف رايك في كتاباتي الجاية ان شاء الله
وربنا يوفقك
...........
ادعولي اوي اوي .....يارب تعدي الايام دي علي خير

لا اله الا الله....محمد رسول الله; 30 مايو 2008 في 2:39 م
هبههههووب يقول...: مش هقولك يا رومى غير بحبك
وربنا يقرب البعيد
ربنا يوفقك ويكرمك ويحقق لك كل ما تتمنى; 3 يونيو 2008 في 5:39 ص
غير معرف يقول...: وحشتينى اوى اوى اوى
اتجدعنى بحبك اوى
هبه بنها
بنهاااااااااء; 19 يونيو 2008 في 9:35 ص
قلب إنسان يقول...: رووووووومى

اتمنى ان تقبلينى زائر فى مدونتك الجميله

وبجد انا شفت الصوره قبل كده وشوفت ناس علقوا عليها بس بأمانه انتى من أحلى التعليقات على الصوره وبجد وانا بقرأ حسيت بأمل وسعاده

اسلوبك حلو جدا وبيوصل للقلب وفعلا الحياه من غير امل وتفائل متكنش حياه لأن الفرق بنا وبين الاموات الامل والتفائل والعمل

ودايما اللى يكون قريب من ربه صدقينى لازم يكون سعيد لأنه عارف ان النفع والضر من عند الله

وهى ده الحياه يا رووومى حزن وسعاده الم وصحه موت وحياه تفائل ويئس وهكذا

والسعاده الحقيقية فى الجنه ان شاء الله

واتمنى ان تتقبلى مرورى

وخالص تحياتى وجزاكى الله خيرا; 22 يونيو 2008 في 4:12 ص
روووومي يقول...: السلام عليكم
ميرسي جدا يا قلب انسان علي الكلام الجميل ده
وانت مش محتاج تستاذن ده شيء يشرفني انك تقرأ مدونتي المتواضعة وتشاركنا باراءك وجزاك الله كل خير
واسفة اني رديت متاخر بس اصلي كنت مشغولة في امتحانات وخلصت اخيرا الحمدلله
نورت مدونتي; 27 يونيو 2008 في 2:18 ص
غير معرف يقول...: بجد مش عارف اقول ايه في التعليق على المدونه العظيمه بعد اللي قاله احبابك وقراء مدونتك الجميله.

بس اللي ممكن اقوله هو اللي انا حسيت بيه بعد ماقرأتها.........!
بجد حسيت انك انسانه عظيمه وجميله جداوالسبب...........!

انك برغم من كل المشاكل والهموم اللي انتى مريتى بيها قادره أنك تفكري في الناس اللي حواليكى مش بس كده وبتحولى كمان انك ترسمى البسمه على وجههم.

على ماأعتقد ان مافيش حد بيعمل زيك كده يمكن ده كان موجود زمان....لكن فى وقتنا هذا كل واحد بيقول يلا نفسى من غير ما يفكر قبلها اذا كان فى حدهيتجرح من قرار زي ده أو لا.....!
بمعنى أوضح كله بيشوف مصلحته فين وبيجري وراها بغض النظر عن مصلحة الاخرين وأذا كان ده ممكن يضر بمشاعرهم واحساسهم أو لا في حين ان الاخرين يتمنون له كل الخير..........!!!

اسف لو كنت خرجت عن التعليق وقلبتها دراما بس بجد انا سعيد بعملك العظيم ده لان انا بكون مبسوط جدا لما بلاقى حد يشارك الاخرين فرحهم وهمهم وكمان يشرفني انى اكون واحد من اصدقائه.....؟

ده لو ماكنش عندك مانع طبعا يادكتوره رومي.

مره تانيه ادلي بأعجابى واهنيكى على الفكره الجميله اللي بتحولى من خلالها نشر السعاده والسرور.....وبجد متعرفيش اد أيه لما قراءة اللى انتي كتباه حسيت ببساطة الحياه أزاى برغم من صعوبتها....

اما بالنسبه للصوره اللي شدتك فهى فعلا جميله جدا مش في رسمها بس ولكن فيما تحمله من معان تعبر عن التحمل والصبر والرضا بالقليل والاحساس بالاخرين حتى ولو لم يكونوا بشرا....!!

بجد انا عاوز افضل اتكلم كده على طول وطلع كل اللي جوايه بس في حاجات تانيه لازم اديها حقها على قد ماقدر انا مضطر اقفل علي كده برغم اني معرفتش اعبر على اللي جوايه من اعجاب بهذا العمل وأتمنى انه يتطور زياده كمان ونشوف منك حاجات أحسن يادكتوره....

أتركك في رعاية الله وأمنه...........مع السلامه; 23 سبتمبر 2008 في 8:21 ص
روووومي يقول...: سلام عليكم.........
A&S ............
انا بجد مش عارفة اقولك ايه عالكلام الجميل ده
بس انا ماستاهلش كل ده والله
انا بس الصورة دي اخدتني وحسستني بمشاعر احنا بجد محتاجين نحسها اليومين دوول عشان نحمد ربنا علي كل حاجة بنمر بيها
وانا باعتذر اني اتاخرت فالرد علي تعليقك بس انا لسه شايفاه دلوقتي
لان البوست انا كاتباه من وقت طويل

نورتني وانت مش محتاج تستأذن لانك بالفعل صديق للمدونة
شرفتني; 30 سبتمبر 2008 في 2:51 م

إرسال تعليق

الحمد لله :)

ليس كل ما يتمناه المرء يدركه...وليس كل ما يتمناه كان ليسعده .. فقط عليه الاستمتاع بما ادركه قد يستيقظ يوما ليجد نفسه قد فقد ما تمناه وما ادركه ...وحينها سيدرك ان ما ادركه هو اكثر شيء كان من الممكن ان يسعده لو تذكر ان هناك خالق عظيم ينظم الكون ويعلم اكثر منه ما يسعده ............. اللهم اني احمدك حمدا كثيرا طيبا مباركا فيه ملء السموات والارض

رومي