الصلاة

سلام عليكم ورحمة الله وبركاته,,,,,
ازيكم عاملين ايه؟
يارب تكونوا بخير وصحة وسعادة
وكل اجازة ترم وانتم طيبين
ال اجازة ال............هو يعني ايه اجازة؟؟؟
بس علي مين
مهما عملوا احنا بردو مع نفسنا بناخد اجازة
اينعم بتيجي في الاخر علي دماغنا
بس بناخدها بردو

اموووووو هند(المهم)
حاليا الحمدلله ربنا كرمني وباقرأ في كتاب عبادات المؤمن
للاستاذ الفاضل عمرو خالد
بجد يا جماعة الكتاب جميل جدا جدا
انا قرات كتير في العبادات
بس مافيش كتاب شدني بصراحة زي الكتاب ده
انا اساسا باحب اسلوب الاستاذ عمرو خالد جدا
ربنا يارب يباركله ويجازيه عننا كل خير
وينور سكته ويعلي شأنه قادر يا كريم
اول عبادة عايزة اكلمكم عنها
هي عبادة الصلاة
او بمعني اصح سنن الصلاة
كنت باصلي الخمسة فروض واحيانا السنَة
ومكنتش اعرف بجد فضل سنن الصلاة
انا مش هتكلم عن الموضوع بالتفصيل
انا بس هاحط لكم الاحاديث النبوية اللي تخص فروض الصلاة وسننها
ندخل في الموضوع

بسم الله الرحمن الرحيم
(اتل ما أوحي اليك من الكتاب وأقم الصلاة إن الصلاة
تنهي عن الفحشاء والمنكر ولذكر الله اكبر والله يعلم ما تصفون)
صدق الله العظيم
يقول النبي صلي الله عليه وسلم :
"ركعتا الفجر خير من الدنيا وما فيها "
بجد يا جماعة اللي مش بيصلي الفجر بيفوته احساس جميل اوي
لو عاش عمره كله من غير ما يصليها
مش هيحس بجد بلذة الايمان
وبجمال القرب من ربنا
لو عايز حد يسمعك ..............مش هتلاقي زي ربنا
يسمعك اوي ويكرمك اوي
لما تصحي الفجر وتصلي وتدعيه وتسأله مسألتك

وتبقي شايل جوا قلبك هموم كتير اوي
وتدعي وتعيط بحرقة
يارب انا تعبان يارب افرجها يارب
وتدخل تنام وانت من جواك واثق ان فرج ربك قريب مهما طال تعبك
هتصحي بقي حاسس اجمل احساس ممكن يحسه بني ادم
وهو الاحساس بالرضا
تبقي راضي بكل اللي بيحصلك مادمت بتعمل الصح واللي عليك
وشوف بقي ربنا هيفرجها عليك ازاي
حديث اخر عن صلاة الفجر يقول صلي الله عليه وسلم:
(لا تدعوا ركعتي الفجر وإن طردتكم الخيل)
شايفين اد ايه كان الحرص علي صلاة الفجر؟؟؟
احنا بقي المنبه يا عيني يفضل يصرخ
واحنا ننااااااااااااااااااام ومانصحاش نصلي
وعلي فكرة ماحدش يتحجج ويقول باظبط المنبه ومش باصحي
عايزة اقولكم انتم لو قعدت اسبوع واحد بس تواظب علي صلاة الفجر
هتلاقي نفسك اتوماتك بتصحي علي اذان الفجر
ولما بيكون من جواك ايمان بالله ورغبة حقيقية في انك تقرب له
هاتقوم ولو حتي كنت نايم ساعة واحدة بس
حسوا يا جماعة بقيمة الصلاة وحلاوتها
عشان تقوموا من النوم وانتم بجد مستنيها بفارغ الصبر
عشان تبقي في سكون الليل وانت وربك وبس

معلش انا رغيت في الحديث عن صلاة الفجر
لاني بجد حسيت حلاوتها
ونفسي والله كلكم تحسوها وتواظبوا عليها
المهم نتكلم بقي عن سنن الصلاة
اولا السنن المؤكدة :
يقول المصطفي صلي الله عليه وسلم :
(من صلي في يوم وليلة اثنتي عشرة ركعة بني له بيت في الجنة
اربعا قبل الظهر وركعتين بعدها
وركعتين بعد المغرب
وركعتين بعد العشاء
وركعتين قبل صلاة الغداة) اي صلاة الصبح
الحديث الشريف مش محتاج اني اوضحه
يا جماعة بيت في الجنة .....
متخيلين؟؟؟..............الله اكبر يارب اعنا علي حسن عبادتك
ممكن نجيب ورقة وقلم ونقسم الورقة علي مدار الاسبوع
ونقسم الورقة لخمس خانات عشان صلاة السنَة
ونشوف كده هنجيب كام بيت في الجنة في الاسبوع

في اكرم من كده؟؟؟.......... اكيد لا
في حد احن علينا من ربنا؟؟؟...........اكيد لا
طب احنا مستنين ايه بقي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

نيجي بقي للسنن الغير مؤكدة:
وهي السنن التي واظب عليها النبي صلي الله عليه وسلم
ولم يرغب فيها مثل ترغيبه في فعل السنن المؤكده وهي:

**ركعتان بعد صلاة الظهر تضمان الي الركعتين المؤكدتين

يقول النبي صلي الله عليه وسلم:
(من صلي أربع ركعات قبل الظهر وأربعا بعدها حرمه الله عز وجل علي النار)

**وأربع قبل العصر او ركعتان

يقول المصطفي صلي الله عليه وسلم:
(رحم الله امرأ صلي قبل العصر أربعا)
وروي سيدنا علي رضي الله عنه وارضاه ان النبي صلي الله عليه وسلم:
(كان يصلي قبل العصر ركعتين )

** وركعتان قبل المغرب:

قال صلي الله عليه وسلم :(صلوا قبل المغرب ركعتين )ثم قالL صلوا قبل المغرب ركعتين ) ثم قال في الثالثة (لمن شاء) خشية ان يتخذها الناس سنة

**وركعتان قبل العشاء

كنت ديما لما باروح اصلي العشاء في المسجد
الاقي اول ما الشيخ يخلص الاذان
الناس كلها تقوم تصلي ركعتين
وانا افضل قاعدة واقعد اقول لنفسي هو مش صلاة السنة للعشاء ركعتين بعدها
هما الناس دوول بيصلوا ايه؟
بس لما قرأت الكتاب عرفت
قال النبي صلي الله عليه وسلم :
( بين كل اذانين صلاة ،بين كل اذانين صلاة )ثم قال في الثالثة (لمن شاء)

يعني بين الاذان وبين اقامة الصلاة لو عايزين نصلي ركعتين
___________________________________-
انا اسفة لاني بقالي كتير اوي مش باكتب في المدونة
بس الحمدلله نويت اني هاكتب بوست كل جمعة باذن الله
ياريتكم تتابعوها بقي
ربنا ميحرمكوش من رغي ابدا يارب
قولووووووو امين
طبعا محدش نطق هههههههه
ماشي ماشي
كالعادة هاطلب منكم ماتحرمونيش من دعواتكم
ان ربنا يهديني ويرزقني الفردوس
احبكم في الله
لا اله الا الله سيدنا محمد رسول الله